Logo Gruppo Su Bundhu NO OBJECT

Su demoniu e Su Bundhu

Comente amus nau in sa sezione Cumprendere su Bundhu (Bundu), custa este una vrigura de ritu ligada a su carrasecare, una esta de propitziu de sa vertilidade e de s’abbundhantzia. Amus peri nau ki sa caratza itti ligada a sas vriguras de sos curridores de Mama Manna e a sus cuncettos de ànima e de vida.

Como kircamus de cumprendere comente semus arribaos dae su Bundhu (Bundu) a sa vrigura de su dimoniu. Difattis, in sa mente de sos oranesos e peri in atteras viddas accurtziu, sa paragula “bundhu (Bundu)” veniti usada pro narrere de su dimonio, de sos diavulos o de animas malas. Custa cosa ponete in luke ki vat’appiu un ciambamentu mannu, ki nos’ata istiriu dae s’importu ki, unu tempus, davamus a custa paragula.

Unu contu vonu a cumprendere podet essere su ki at’attu sa Ciesa pro isparghere sa paragula de Deus in Sardigna. Pro custu nos torran vonas sa paragulas de su Papa Gregorio Magno (590 – 604 d.c), ki at nau:

“ove non sia possibile eliminare i residui di paganesimo, si tenti di cristianizzarli, perché col tempo si perda il ricordo del culto primitivo e rimanga soltanto quello rivolto al vero Dio”.

Sas medas litteras mandadas dae su papa a sos sardos e in supra ‘e tottus cussas pro Ospitone duca de Barbagia, sunu sas pius vonas pro narrere de cantu seret punta assusu de irradikinare sa pagania dae su coro de sos barbaricinos ki, at nau “vivono come animali insensati, non conoscono il vero Dio, adorano legni e pietre”.
Sicunde Joyce Mattu “mentres ki Ospitone at seperau de eses cristianu, tottu sos populos inciviles ki, non de atteru, sunu istaos massacraos ca pro issos s’abba, sos arvules e sas predas ini galu sa religione issoro, sunu istaos custrintos de atzetare su cristianesimu”.[1]

Si cumprendete ki cando sa zente est custrinta a’fakere su ki non keret, venit diffitzile ki ciambete modu ‘e akere dae oje a crasa, ispezie si l’at attu pro medas e medas annos assecus. Eppuru s’istoria at dau rejone a su Papa Gregorio Magno e in’uve unu tempus v’ini locos de cùltu e ritos paganos, oje acattamus ciesas e estas de santos. Sas vriguras kin corros, peddes e sonatzos si sunu mudadas in cussas de sos santos matessi oppuru in su dimoniu, cando cumbeniat pius pro ammasedare sa zente kin su timinzu de Deus e de su diavulu, kin tottu su male suo.
Si cumprendet peri ki sa zente posta a timere est pius vatzile de manizare, e galu pius cando cumintzat a times peri s’umbra sua o sa survada ‘e ventu.

In cust’istrada de “incivilimento cattolico” podimus viere zertas cosas ki nos ana vattiu dae pessare a su bundhu (bundu) comente una vrigura vona: ke a su ventu, ke a sa vida, ke i s’ànima; vinas a pessare a su bundhu (bundu) comente una vrigura mala: ke a su dimoniu.

Un’attera cosa ki nos podete azudare a cumprendere e ki ligat vene a su c’amus nau, este ki ispaghinadas pro tottu su territoriu de Orane vi sunu medas ciesas (pius de 23, contande peri sas isconsacradas). Custu nos nata de cantu apat tentu su cristianesimu in sos oranesos, e peri cantu issos pendhiana dae sa gana e aker esta. Estas paganas prima e cumandadas a pustis.

Redatore: Antonello Masini

Note bibliografiche

1 J. Mattu, Dea Madre, Bundhu e dintorni
visita il sito www.wmamba.it