Logo Gruppo Su Bundhu NO OBJECT

Sa Caratza

maschera de Su Bundhu pubblicata nella rivista Il Ponte 1951
Foto tratta dalla rivista Il Ponte, Anno VII - N. 9-10, Settembre-Ottobre 1951
Su Bundhu (Su Bundu) este sa caratza de carrasecare de sa vidda 'e Orane. In custa pagina kistionamus de comente este cumposta sa caratza. Mentres in sos capitulos innantis amus a biere de cumprendere ite keret narrere e kircamus de acattare sa cosas ki la lìgana a sa tradizione de su carrasecare Oranesu.

Sa caratza

Cussa de Su Bundhu (Su Bundu) este una caratza mesu Voe e mesu Omine (antropo-bovina) ki cucuzzata sa cara intrega de kie la vestit. Hata una vorma 'e ovu simile a cussa de s'omine, kin trattos de agherju meda signaos, comente su nasu: ki ispuntata a foras dae sa cara, tipu pithu 'e ave. Sos mustatzos ki nd'inghiriana sa lavra e s'isparghene tipu sannas. In sutta 'e sa vuca essiti sa varveddha attundiada. Pro hinire vi sunu  sos corros de voe, attacaos a sos cherveddhos, ammustrana cantu siana a làcana s'omine e s'animale, e cantu s'unu siat ligau a s'ateru dae sas netzessidades de sa vida.

Sa caratza venit hatta tottu in gurticciu, trabagliada dae sas manos abiles de sos artigianos. In cussa ki si pessat siata sas tradizionale, sa cara e su nasu sun tintos de ruju (est meda probàbile ki anticamente veniat usau su sambene de animale pro intinghere a ruju). Mentres ki su mustatzos, sa varvedda e so scorros sunu in colore biancu.  De rekente si podene viere peri caratzas in gurticciu kene colorau e pintau a intagliu pro marcare tzertos trattos.

Su Saccu

Su Saccu este su manteddu de vresi usau a cucuzzu de tottu sa vrigura de Su Bundhu (Su Bundu). Este una veste ki 'nde venit dae sa tradizione agro-pastorale barbaricina, cando comente istratzu veniat usau in medas modos. Vidu ki sa lana este unu vonu isolante, serviata in primis pro vardare sa pessona dae su tempus malu; ma cando iti netzessariu serviat peri comente manta pro dormire, o comente tivaza ki permitiat a pastores e peregrinos de manicare kin unu pacu 'e decoro.

Su saccu est una vestimenta semplice e pratica, ki hata mantesu s'importantzia sua in su tempus, mudande ghettu kin rifiniduras e vronzas, vinzas a diventare Su Gabbanu, unu gapotto de vresi nigheddu vene refiniu, kin manicas e cingheddhu, ki veniat usau pro sas occasiones de vonu.

In sas mustras de folklore de Sos Bundhos (Bundos) si podete viere siat su saccu che su gabbanu. Ambos jukene unu cappucciu meda largu ki, una vorta presu a sa caratza de gurticciu, cuvata sa cara de su Bundhu (Bundu) ki la vestit.

Su trivutzu (il tridente)

Su trivutzu unu trastu ki veniata usau dae massaios e lavrones pro sos trabaglios de campagna. Venit hattu trabagliande unu cantu de ramu 'e arvule, ki podet essere de pira, de ozzastru o, su pius de sas vortas de kercu.

Cando essini a carrasecare Sos Bundhos (Bundos)  aitzana sa zente minetzandela kin su trivutzu. Punghendelas in sos pedes ispinghene sas pessones a s'azzunghere a sa danza de propitziu, in modu ki sa Mama Manna diat vruttos in abbundantzia. Pro sa esta de Sant'Antoni, in Jannarju, inghiriana su ocu, mandande vokes de ventu e de mulios, lu aitzana kin viammas artas e iskinziddas.

visita il sito www.wmamba.it